Інтэрнэт-выстаўка «Гісторыя нашай памяці» падрыхтавана Беларускім навукова-даследчым цэнтрам электроннай дакументацыі і прымеркавана да 100-годдзя архіўнай службы Рэспублікі Беларусь.
Гэта першы віртуальны міжархіўны праект, прысвечаны гісторыі беларускіх архіваў. Яго галоўная мэта – азнаёміць шырокую грамадскасць, прафесійных даследчыкаў і ўсіх зацікаўленых асоб з дакументамі Нацыянальнага архіўнага фонду, якія адлюстроўваюць гісторыю айчыннай архіўнай службы з моманту яе афіцыйнага заснавання 12 верасня 1922 года да цяперашняга часу.
У экспазіцыю ўключана больш за 100 лічбавых копій дакументаў, фотаздымкаў і відэа, якія ілюструюць не толькі прафесійны бок дзейнасці беларускіх архіваў, але і іх паўсядзённае жыццё. Многія з гэтых матэрыялаў публікуюцца ўпершыню.
Праект складаецца з чатырох асноўных тэматычных раздзелаў: «Станаўленне (1922–1941)», «Вайна (1941–1945 гг.)», «Стварэнне (1945–1991 гг.)», «Незалежнасць (з 1991 г.)». Усе дакументы размешчаны ў храналагічным парадку і суправаджаюцца архіўнымі пошукавымі дадзенымі. Фота і відэа вынесены ў асобны раздзел «Медыятэка». Усе выявы можна перагортваць і масштабаваць (для гэтага неабходна скарыстацца спецыяльным карыстальніцкім меню, якое адлюстроўваецца пры адкрыцці кожнага дакумента ў правым верхнім вуглу экрана). З поўным спісам дакументаў, якія экспануюцца, можна азнаёміцца ў раздзеле «Пералік дакументаў».
Важнае месца займае раздзел «Гісторыя», дзе прадстаўлены гістарычныя даведкі аб гісторыі нацыянальнай архіўнай службы. Для зручнасці ён падзелены на чатыры часткі, якія храналагічна супадаюць з асноўнымі тэматычнымі раздзеламі інтэрнэт-выстаўкі. Пры падрыхтоўцы гэтых тэкстаў выкарыстоўваліся работы М. Ф. Шумейкі, Т. Д. Гярновіч, С. В. Жумара, В. Л. Насевіча, А. Я. Рыбакова і шэрагу іншых беларускіх даследчыкаў.
У раздзеле «Беларуская архіўная служба сёння» размешчаны фотаздымкі, якія адлюстоўваюць работу айчыннай архіўнай службы на сучасным этапе.
Пры афармленні віртуальнага праекта былі выкарыстаны карціны беларускіх мастакоў У. Стэльмашонка, М. Савіцкага і М. Данцыга.
Арганізатары праекта:
Дэпартамент па архівах і справаводстве Міністэрства юстыцыі Рэспублікі Беларусь
Беларускі навукова-даследчы цэнтр электроннай дакументацыі
Удзельнікі праекта:
Нацыянальны архіў Рэспублікі Беларусь
Беларускі дзяржаўны архіў кінафотафонадакументаў
Беларускі дзяржаўны архіў-музей літаратуры і мастацтва
Дзяржаўны архіў Мінскай вобласці
Дзяржаўны архіў Брэсцкай вобласці
Дзяржаўны архіў Віцебскай вобласці
Дзяржаўны архіў Гомельскай вобласці
Дзяржаўны архіў Гродзенскай вобласці
Дзяржаўны архіў Магілёўскай вобласці
Дзяржаўны архіў грамадскіх аб’яднанняў Магілёўскай вобласці.